Atgongumerkjasølan til heimadystin móti Lech Poznań er nú byrjað. Dysturin verður spældur á Tórsvølli, har KÍ enn einaferð skal royna seg móti einum av sterkastu feløgunum í evropeisku undankappingini.

Lech Poznań er verandi pólskur meistari og eitt av størstu og mest søguríku feløgunum í Póllandi. Felagið hevur drúgvar royndir í evropeiskum fótbólti og hevur fleiri ferðir spælt bæði í UEFA Champions League og UEFA Europa League.

KÍ hevur seinastu árini víst, at felagið kann kappast á hægsta stigi í evropeiskum fótbólti. Við stuðlinum frá føroysku fjepparunum eru fleiri minnilig kvøld skrivað inn í søguna, og nú bíðar enn ein stór avbjóðing.

Tí verður aftur tørvur á sterkum stuðli frá áskoðarunum. Vit vóna, at nógv KÍ-fólk og føroyskir fótbóltsfjepparar fara at leggja leiðina á Tórsvøll, so vit saman kunnu skapa teir serligu karmarnar, sum hava eyðkent KÍ í Evropa.

Keyp atgongumerki við at trýsta her.

Vit síggjast á Tórsvølli.

Koyr á KÍ!