Viðtøkur fyri Klaksvíkar Ítróttarfelag
§ 1. Navn og heimstaður:
1. Navn felagsins er Klaksvíkar Ítróttarfelag, stytt: KÍ.
2. Heimstaður felagsins er Klaksvík.
§ 2.Endamál:
1. Endamál felagsins er fyrst og fremst at kveikja áhuga og virka til frama fyri fótbóltsleiki í Norðoyggjum. Felagið er í tí sambandi limur í Fótbóltsambandi Føroya og hevur skyldu til at virka sambært teimum har galdandi lógum og reglum. Felagið kann eisini umboða aðrar ítróttargreinar.
§ 3. Limaskapur:
1. Øll, sum taka undir við endamáli felagsins, kunnu vera limir.
2. Limaskapur fæst við at rinda tað av aðalfundinum árligt ásetta limagjaldið.
3. Aðalfundur felagsins kann koyra lim úr felagnum, hevur hann eftir aðalfundsins meting mótarbeitt felagnum ella myndugleikum tess, ella hevur víst ósømiligan atburð ella á annan hátt víst ringan ítróttar- ella felagsanda.
§ 4. Evsta vald - aðalfundurin:
1. Limir felagsins mynda aðalfundin, sum er evsta vald hjá KÍ.
2. Ársaðalfundurin verður hildin á hvørjum ári, áðrenn februar mánaður er úti.
3. Boðað verður á heimasíðu felagsins til aðalfundir og eykaaðalfundir í seinasta lagi 14 dagar fyri fundin, og í fyrsta lagi 1 mánað fyri fundin.
4. Luttøka á aðalfundi er treytað av, at eingin eftirstøða er fyri limagjald, sí § 3 stk. 2.
5. Allir limir, sum eru 18 ár ella eldri, hava atkvøðurætt á aðalfundinum.
6. Atkvøðast kann ikki við fulltrú.
7. Nevndarforfólki kann bjóða serligum gestum við á aðalfundin, sum ikki eru limir, men hava hesir ikki atkvøðurætt.
8. Samtyktir á aðalfundi verða gjørdar við vanligum meiriluta av møttum limum, tó undantiki𠧧 9 og 10.
9. Atkvøðugreiðsla skal fara fram skrivliga, krevja meira enn tveir limir tað.
10. Val av nevndarforfólki, nevndarnæstforfólki og nevndarlimum, um fleiri valevni eru, fara altíð fram skrivliga.
11. Ársaðalfundurin hevur hesa dagsskrá:
1. Val av fundarstjóra og fundarskrivara.
2. Áseting av gildugum atkvøðum, samb. stk. 4.
3. Ársfrágreiðing frá nevndarforfólki.
4. Framløga av grannskoðaðum roknskapi til góðkenningar.
5. Ásetan av árligum lima- og leikaragjaldi, og møguliga avsláttarskipan til leikaragjaldið.
6. Innkomin mál.
7. Valevni til nevndarforfólk, nevndarnæstforfólk ella nevndarlim hava rætt til 5 minuttir hvør at bera fram valrøðu.
8. Val av nevndarforfólki, nevndarnæstforfólki og øðrum nevndarlimum. Aðalfundurin velur nevndarforfólk og nevndarnæstforfólk beinleiðis á aðalfundinum, meðan nevndin annars skipar seg sjálv. Øll val eru fyri 1 ár. Afturval er loyvt.
9. Val av grannskoðara.
10. Ymiskt.
12. Uppskot til nevndarforfólk, nevndarnæstforfólk og nevndarlimir skulu vera nevndini í hendi í seinasta lagi 8 dagar fyri aðalfundin.
§ 5. Eykaaðalfundur:
1. Eykaaðalfundur er, tá aðalfundurin, nevndarforfólki, nevndarnæstforfólki saman við tveimum nevndarlimum, tríggir nevndarlimir ella 1/10 av limum felagsins krevja tað. Nevndin lýsir síðani, áðrenn 8 dagar eru farnir, fund sambært § 4 stk. 3.
2. Tá nevndarlimir ella limir krevja eykaaðalfund, skal skriv við grundgeving og ætlaðari fundarskrá leggjast við áheitanini.
§ 6. Nevndin:
1. Nevndarforfólk felagsins, nevndarnæstforfólk og 4-6 aðrir nevndarlimir mynda nevnd felagsins, og hava dagligu leiðsluna um hendi. Nevndin hevur í felag ábyrgd av, at fíggjarligu, ítróttarligu og umsitingarligu viðurskifti felagsins vera nøktandi handfarin, og eigur at gera sær greiðar reglur fyri hesum arbeiði.
2. Nevndin skal gera málsetning og menningarætlan fyri felagið fyri styttri og longri tíðarskeið, og skal javnan endurskoða hesi.
3. Nevndin kann viðgera og taka avgerð í øllum spurningum felagnum viðvíkjandi.
4. Stendur á jøvnum í møguligari atkvøðugreiðslu í nevndini, er atkvøða nevndarforfólksins galdandi.
5. Nevndarforfólki kallar nevndina saman, tá viðkomandi heldur tað vera neyðugt. Nevndarnæstforfólki saman við einum nevndarlimi ella tveir nevndarlimir í felag kunnu eisini kalla nevndina saman.
6. Nevndin er viðtøkufør, tá ein meiriluti við nevndarforfólkinum ella nevndarnæstforfólkinum er møttur.
§ 7. Besta mansliðsnevndin - undirnevnd
1. Besta mansliðsnevndin er ein undirnevnd og tekur sær av øllum avgerðum viðvíkjandi fremsta mansliði felagsins.
2. Besta mansliðsnevndin er mannað við nevndarforfólki felagsins, ið er føtt forfólk, umframt nevndarnæstforfólki felagsins og tveimum av nevndini valdum nevndarlimum.
3. Besta mansliðsnevndin skipar sítt arbeiðsbýti sjálv.
4. Nevndarforfólki við einum besta mansliðnevndarlimi bindur felagið fyri tí ið viðvíkir besta mansliði felagsins.
5. Besta mansliðsnevndin skal árliga gera rakstrarætlan við øllum mettum inntøkum og útreiðslum at leggja fyri nevnd felagsins.
6. Besta mansliðsnevndin letur frá sær frágreiðingar í minsta lagi hálvárliga, til nevnd felagsins, har greitt verður frá um ítróttarligu og fíggjarligu viðurskiftini.
7. Besta mansliðsnevndin skal tryggja, at felagið lýkur øll krøv og standardir í samband við lands- og steypakappingar, umframt møguligar altjóða dystir.
§ 8. Fíggjarviðurskifti:
1. Nevndarforfólki saman við nevndarnæstforfólkinum ella einum nevndarlimi bindur felagið.
2. Nevndarforfólki kann veita umboðsfulltrú til nevndarnæstforfólki og nevndarlimir.
3. Roknskaparár felagsins er álmanakkaárið.
4. Roknskapurin verður gjørdur sambært góðum roknskaparsiði.
5. Nevndarforfólk og allir nevndarlimir skulu skriva undir roknskapin og protokollina.
6. Løggildur ella skrásettur grannskoðari skal grannskoða ársroknskap felagsins.
7. Felagið heftir bert fyri skyldum sínum við teimum til ein og hvørja tíð verandi ognum, sum hoyra felagnum til. Limir, undir hesum eisini nevndarlimir, hefta ikki persónliga fyri felagsins skyldum, men bert við sínum limagjaldi.
8. Nevndin hevur heimild at tekna ábyrgdartrygging fyri nevnd felagsins og møguligar aðrar ábyrgdarpersónar.
§ 9. Avtøka:
1. KÍ verður tikið av, tá tveir aðalfundir við í minsta lagi trimum vikum ímillum hava samtykt hetta. Á báðum hesum aðalfundum skulu í minsta lagi 2/3 av limum felagsins vera møttir. Sama krav til meiriluta á tveimum aðalfundum við í minsta lagi trimum vikum ímillum er galdandi í sambandi við samanlegging við annað felag.
2. Ognirnar hjá KÍ skulu við avtøku eftir avgerð frá tí síðsta avtakandi aðalfundinum latast til eitt ítróttarligt ella almannagagnligt endamál.
§ 10. Onnur viðurskifti:
1. Viðtøkur felagsins verða endurskoðaðar so hvørt tørvur er á hesum, og í minsta lagi eiga tær at viðgerast á aðalfundi 3. hvørt ár. Viðtøkur felagsins kunnu einans verða broyttar á aðalfundi felagsins og krevst ein atkvøðumeiriluti á minst 2/3 av greiddum atkvøðum.
2. Keyp, søla og veðseting av fastari ogn, lánupptøka og aðrar fyri felagið týdningarmiklar íløgur kunnu viðtakast við nevndarsamtykt. Til tað krevst full semja í nevndini. Keyp, søla og veðseting av fastari ogn, lánupptøka og aðrar fyri felagið týdningarmiklar íløgur kunnu eisini viðtakast á aðalfundi felagsins við vanligum meiriluta.
Soleiðis samtyktar á eykaaðalfundi felagsins tann 18. desember 2023.