Tað er hørð kapping um annað plássið í betrideildini, har KÍ og HB liggja á jøvnum við 48 stigum - har KÍ hevur leikt ein dyst færri. Í dag kemur so HB á vitjan, ið KÍ hevur havt trupulleikar av at basa í hesum kappingarárinum. Hetta er fimta ferðin liðini skulu møtast, og hevur HB vunnið teir fýra ið hava verið leiktir.

Fyriuttan Jákup B Andreasen og Jonn Johannesen væntast KÍ hópurin at vera í sterkastu útgávu. Pætur Petersen, Dan í Soylu, Patrick da Silva, Børge Petersen, Ári í Haraldstovu Petersen og Joseph Michael Williams leiktu í gjár við næstbesta liðnum, tá ið teir megnaðu at knógva hoyvíksmonnum í gjár í niðurflytingarstríðnum - tað er óvist hvørjan leiklut hesir fáa í dag.