AVSPÆL
22. apr 2023
Regin Sivertsen

Varpaðir út úr steypakappingini

Lagt var upp til stórdyst, tá ið KÍ vitjaði B36 í fyrsta umfari í kappingini um Løgmanssteypið. Hendan kappingin gjørdist stutt, fyri okkara viðkomandi, tí B36 vann dystin 2-0

Vit høvdu okkurt at hevna, tí eftir tapið í steypafinaluni í fjør, var eingin ivi um, at vit ætlaðu okkum aftur í steypafinaluna - og vinna hana! 

KÍ fekk ongantíð reiðiliga spælið at koyra, og hóast leikliga yvirvág í partum av dystinum, so eydnaðist tað okkum ongantíð at fáa bóltin í netið. Tvær ferðir var bólturin á stong- og yvirleggjara men inn vildi bólturin ikki í dag. 

Tað tykist sum, at vit alt ov ofta verða fangaðir í umstillingum, og í dag blivu vit straffaðir uppá hetta.

Hóast tað ikki bar til sigur í dag, so mugu vit bretta upp ermar - og hyggja frameftir. Næst á skránni er B68 á Svangaskarði. Takk fyri stuðulin í dag, og koyr á KÍ.

Mynd: Sverri Egholm, portal.fo.