KÍ víðari í Champions League

24. august 2020
  • KÍ Føroyameistarar 2019 | Mynd: Norðoyaportalurin

UEFA hevur gjørt av, at KÍ vinnur dystin móti Slovan Bratislava, sum skuldi vera mikudagin 19/8-2020 við Djúpumýru í Klaksvík.

Tað hevur tikið allan dagin at koma til niðurstøðuna, men stutt fyri klokkan 17 komu boð frá UEFA um, at KÍ er liðið, sum skal spæla móti Young Boys í Bern mikukvøldið.
 
Í niðurstøðuni sigur UEFA stutt, at sambært Annex I.2.1, reglugerð fyri Champions League 2020/21, er Slovan Bratislava dømt at tapa dystin 3-0.
 
Eini forloysandi boð, tí KÍ hevur verið í bíðustøðu, síðan tað kom fram, at ein korunutilburður var staðfestur í fyrra hópinum hjá Slovan Bratislava, sum kom til landið fyri einari viku síðan. Hendan bíðistøðan er nú vekk, og KÍ hópurin heldur sostatt fram við fyrireikingunum til dystin móti Young Boys. Eini boð, sum komu á sjálvum 116 ára føðingardegnum hjá felagnum.
 
Tummas Lervig, formaður í KÍ, sigur, at honum vantar orð, men sjálvandi fegnast felagið um rættvísu avgerðina hjá UEFA.
 
Føroyar eru á reyða listanum hjá Sveis vegna høga talið av smittutilburðum, men undantak er givið KÍ ferðalagnum í sambandi við dystin. Fyrireikingar til ferðina til Sveis eru í hæddini, men enn er ógreitt, júst nær fráferðin verður.
 
Dysturin millum Young Boys og KÍ verður spældur í Bern klokkan 20.15 lokala tíð mikukvøldið (19.15 FØ tíð).


Seinastu tíðindi

FM dystur hjá KÍ kvinnum
16.10.2020
Jesper Brinck longt sáttmálan við KÍ
27.09.2020
Nýggur KÍ sangur útgivin
24.09.2020
Fá eina KÍ skermmynd til tína telefon
22.09.2020
Kringvarpið vísir dystin hóskvøldið
21.09.2020